डिजिटल मुंबई चौफेर। १६ फेब्रूवारी २०२२।
केंद्रीय कृषी मंत्रालयाने २०२१-२२ साठी प्रमुख पिकांच्या उत्पादनाचा दुसरा आगाऊ अंदाज जारी केला आहे. आगाऊ अंदाजानुसार, देशात ३१६.०६ दशलक्ष टन अन्नधान्याचे विक्रमी उत्पादन झाले आहे. शेतकऱ्यांचे कठोर परिश्रम, शास्त्रज्ञांचे कार्यक्षम संशोधन आणि सरकारच्या शेतकरी अनुकूल धोरणांमुळे देशात अन्नधान्याच्या उत्पादनात नवा विक्रम होत असल्याचे केंद्रीय कृषी आणि शेतकरी कल्याण मंत्री नरेंद्र सिंह तोमर यांनी म्हटले आहे. . २०२०-२१ या वर्षात झालेल्या उत्पादनापेक्षा हे प्रमाण ५.३२ दशलक्ष टन अधिक आहे. २०२१-२२ या वर्षातील उत्पादन देखील गेल्या पाच वर्षांच्या (२०१६-१७ ते २०२०-२१) सरासरी अन्नधान्य उत्पादनापेक्षा २५.३५ दशलक्ष टनांनी जास्त आहे.
२०२१-२२ या वर्षात तांदळाचे एकूण उत्पादन १२७.५३ दशलक्ष टन विक्रमी असल्याचा अंदाज आहे. गेल्या पाच वर्षांतील सरासरी ११६.४४ दशलक्ष टन उत्पादनापेक्षा हे प्रमाण ११.४९ दशलक्ष टनांनी जास्त आहे. २०२१-२२ या वर्षात गव्हाचे एकूण उत्पादन १११.३२ दशलक्ष टन विक्रमी असल्याचा अंदाज आहे. गेल्या पाच वर्षांतील सरासरी १०३.८८ दशलक्ष टन उत्पादनापेक्षा हे प्रमाण ७.४४ दशलक्ष टनांनी जास्त आहे. पौष्टिक आणि भरड तृणधान्यांचे उत्पादन अंदाजे ४९.८६ दशलक्ष टन आहे, जे सरासरी उत्पादनापेक्षा ३.२८ दशलक्ष टन अधिक आहे.
दुसऱ्या आगाऊ अंदाजात प्रमुख पिकांचे अंदाजे उत्पादन पुढीलप्रमाणे आहे.
>> अन्नधान्य-३१६.०६ दशलक्ष टन (विक्रमी)
>> तांदूळ -१२७.९३ दशलक्ष टन (विक्रमी)
>> गहू – १११.३२ दशलक्ष टन (विक्रमी)
>>पोषण/भरड तृणधान्ये – ४९.८६ दशलक्ष टन
>> मका – ३२.४२ दशलक्ष टन (विक्रमी)
>> कडधान्ये – २६.९६ दशलक्ष टन (विक्रमी)
>> तूर – ४.०० दशलक्ष टन
>> चना – १३.१२ दशलक्ष टन (विक्रमी)
>> तेलबिया – ३७.१५ दशलक्ष टन (विक्रमी)
>> भुईमूग – ९.८६ दशलक्ष टन
>>सोयाबीन -१३.१२ दशलक्ष टन
>>रेपसीड आणि मोहरी – ११.४६ दशलक्ष टन (विक्रमी)
>> ऊस – ४१४.०४ दशलक्ष टन (विक्रमी)
>>कापूस – ३४.०६ दशलक्ष गाठी (प्रति १७० किलो)
>> ताग आणि मेस्ता -९.५७ दशलक्ष गाठी (प्रति १८० किलो)
पाच वर्षांच्या सरासरीपेक्षा जास्त उत्पादन
२०२१-२२ या वर्षात एकूण डाळींचे उत्पादन २६.९६ दशलक्ष टन असल्याचा अंदाज आहे, जे गेल्या पाच वर्षांतील २३.८२ दशलक्ष टनांच्या सरासरी उत्पादनापेक्षा ३.१४ दशलक्ष टनांनी जास्त आहे.
२०२१-२२ मध्ये देशातील एकूण तेलबियांचे उत्पादन ३७.१५ दशलक्ष टन असल्याचा अंदाज आहे, जे २०२०-२१ या वर्षातील ३५.९५ दशलक्ष टनांच्या तुलनेत १.२० दशलक्ष टनांनी जास्त आहे. याशिवाय, २०२१-२२ या वर्षात तेलबियांचे उत्पादन सरासरी तेलबिया उत्पादनापेक्षा ४.४६ दशलक्ष टनांनी जास्त आहे.
ऊस उत्पादनही पाच वर्षांच्या सरासरीपेक्षा जास्त आहे
२०२१-२२ या वर्षात देशात ४१४.०४ दशलक्ष टन ऊस उत्पादनाचा अंदाज आहे, जे सरासरी ३७३.४६ दशलक्ष टन ऊस उत्पादनापेक्षा ४०.५९ दशलक्ष टन अधिक आहे.
कापूस उत्पादन अंदाजे ३४.०६ दशलक्ष गाठी (प्रति १७० किलो) आहे, जे सरासरी ३२.९५ दशलक्ष गाठींच्या उत्पादनापेक्षा १.१२ दशलक्ष गाठींनी जास्त आहे. ताग आणि मेस्ताचे उत्पादन अंदाजे ९.५७ दशलक्ष गाठी (प्रति १८० किलो) आहे.