बोदवडच्या शिवसेना शिंदे गटाच्या पदाधिकाऱ्यांचा राष्ट्रवादीत प्रवेश

मुंबई चौफेर | १३ नोव्हेंबर २०२२ | आ.एकनाथराव खडसे, राष्ट्रवादी जिल्हाध्यक्ष रवींद्र भैय्या पाटील यांच्या नेतृत्वावर विश्वास ठेवून तालुक्यातील बोदवड येथिल शिवसेना शिंदे गटाच्या पदाधिकाऱ्यांनी आमदार चंद्रकांत पाटील यांच्यावर अविश्वास दाखवून राष्ट्रवादी पक्षात प्रवेश केला आहे.

बोदवडचे सरपंच कमलाकर तायडे, शिवसेना शिंदे गट शाखाध्यक्ष लहू घुळे, उपसरपंच पवन कोंगळे यांच्या प्रवेश घेणाऱ्यांमध्ये समावेश आहे. एकनाथराव खडसे यांनी सर्वांच्या गळ्यात राष्ट्रवादी काँग्रेस पक्षाचा रुमाल टाकून त्यांचे राष्ट्रवादी काँग्रेस पक्षात स्वागत केले.

यावेळी सरपंच कमलाकर तायडे म्हणाले, गावात विकास कामे होतील या आशेने आमदार चंद्रकांत पाटील यांच्या सोबत होतो. परंतु, तिन वर्षात भ्रमनिरास झाला. याउलट एकनाथराव खडसे यांच्या माध्यमातून बोदवड गावात आतापर्यंत अनेक विकास कामे झाली. यापुढे सुद्धा एकनाथराव खडसे विकास कामांना निधी उपलब्ध करून देतील हा विश्वास आहे. जनसंवाद यात्रे दरम्यान बोदवड येथिल शिंदे गटाचे इतर पदाधिकारी प्रवेश करणार असल्याचे कमलाकर तायडे यांनी सांगितले.

आ. एकनाथराव खडसे म्हणाले, बोदवड येथे सभागृह, बुद्ध विहार, रस्ते, पाणी पुरवठा यासारख्या मुलभूत सुविधांसाठी आतपर्यंत निधी उपलब्ध करून दिला. बोदवड फाटा ते पूर्णा नदी पर्यंत रस्ता डांबरीकरणासाठी निधी उपलब्ध करून दिला. भविष्यात सुद्धा राहिलेल्या विकास कामांना निधी उपलब्ध करून देण्यासाठी कटिबद्ध आहे. प्रवेश केलेल्या सर्वांचे राष्ट्रवादी काँग्रेस परिवारात स्वागत आहे.

महाराष्ट्र राज्य वस्त्रोद्योग महासंघाच्या उपाध्यक्षा रोहिणी खडसे खेवलकर, जिल्हासरचिटणीस ईश्वर रहाणे, माजी सभापती दशरथ कांडेलकर, प्रविण कांडेलकर,माजी सरपंच ज्ञानदेव मांडोकार,वामन पाटील, राष्ट्रवादी युवक शाखाध्यक्ष योगेशइंगळे, उपाध्यक्ष पंजाबराव पाटील, वसंत पाटील, विशाल रोटे, चेतन राजपुत, समाधान माळी आणि पदाधिकारी उपस्थित होते.